2 മുസ്‌ലിം ലോകം ആഘോഷ നിർവൃതിയിൽ

(അൽ അൻസാർ സെന്ററിന്‌ വേണ്ടി എഴുതിയത്‌)

ലോക മുസ്ലിംകൾ ആഘോഷ നിർവൃതിയിൽ. ഇന്ന്‌ ഈദുൽ ഫിത്വർ. വിശ്വാസികൾക്ക്‌ അല്ലാഹു അനുവദിച്ചുനൽകിയ ആഘോഷങ്ങളായ രണ്ട്‌ പെരുന്നാളുകളിൽ ഒന്ന്‌. 

റമദാൻ, സത്യാസത്യ വിവേചന ഗ്രന്ഥം അവതരിപ്പിക്കപ്പെട്ടമാസം. മനുഷ്യന്‌ നന്മതിന്മകൾ വേർതിരിച്ചുകാണിക്കുന്ന, ശാന്തിയുടെയും സമാധാനത്തിന്റെയും പാതകൾ വിവരിക്കുന്ന, സർവ്വോപരി ശാശ്വത ജീവിത വിജയത്തിന്റെ ഫോർമുല പഠിപ്പിക്കുന്ന ഗ്രന്ഥം. ആ മഹത്തായ ഗ്രന്ഥം അവതരിപ്പിക്കപ്പെട്ട പുണ്യമാസം വിശ്വാസികൾ സന്തോഷത്തോടെ സ്വീകരിച്ചു. തന്റെ അടിമകൾക്ക്‌ അല്ലാഹു ഔദാര്യമായി നൽകിയ, പുണ്യങ്ങൾ നേടാനുള്ള അസുലഭ അവസരങ്ങൾ അവർ ഉപയോഗിച്ചു.
വിശ്വാസികളുടെ കഴിഞ്ഞുപോയ ദിന രാത്രങ്ങൾ, ഒരുമാസക്കാലത്തെ കഠിനമായ പരിശ്രമത്തിലൂടെ, അന്ന പാനീയങ്ങൾ ഉപേക്ഷിച്ച്‌ വിശപ്പും ദാഹവും സഹിച്ചും നോട്ടം സംസാരം ഇടപഴകൽ, തുടങ്ങിയവയിലെല്ലാം ശ്രദ്ധയും നിയന്ത്രണവും. പലതും ത്യജിച്ചു. പലതും അനുഷ്ഠിച്ചു. അങ്ങിനെ ജീവിത രീതിയെ സൂക്ഷമമായി ചിട്ടപ്പെടുത്തി. ഓരോ നിമിഷാർധങ്ങളും മനസ്സിനെ പ്രാർത്ഥനാ നിർഭരമാക്കി, കഴിഞ്ഞുപോയ നാളുകളിൽ ജീവിതത്തിൽ വന്നു പോയ വീഴ്ചകളിൽ നിന്നും തെറ്റുകളിൽനിന്നും മോചനം തേടുകയും പശ്ചാത്താപ മനസ്സുമായി നിരന്തരമായ പ്രാർത്ഥനകൾ വഴി തന്റെ ജീവിതം പരിശുദ്ധമാക്കാൻ പരിശ്രമിച്ചും ഒരു മാസക്കാലം ഫലപ്രദമായി ഉപയോഗിക്കാൻ സാധിച്ചതിലുള്ള സന്തോഷമായി, ഈ പുണ്യനിമിഷങ്ങൾ നൽകിയ അല്ലാഹുവിനുള്ള നന്ദിയായി ഓരോ വിശ്വാസിയും സന്തോഷത്തോടെ ആഹ്ലാദത്തോടെ ഉരുവിട്ടുകൊണ്ടിരിക്കുന്നു. 

..അല്ലാഹു അക്ബർ .... വലില്ലാഹിൽ ഹംദ്‌.  അല്ലാഹുവാണ്‌ ഏറ്റവും വലിയവൻ, അവനാണ്‌ സർവ്വ സ്തുതിയും. 

അല്ലാഹു വിശ്വാസികൾക്ക്‌ നൽകിയ സമ്മാനമാണ്‌ ഈദുൽ ഫിത്വർ. റസൂൽ (സ) പറഞ്ഞു: പെരുന്നാൽ ദിവസം മലക്കുകൾ വഴിയോരങ്ങളിൽ നിന്ന്‌ ഇങ്ങനെ വിളിച്ചു പറയും "മുസ്ലിംകളേ, നിങ്ങൾ അല്ലാഹുവിന്റെ അടുത്തേക്ക്‌ പോവുക. അവൻ നിങ്ങൾക്ക്‌ നന്മ നേരാനുള്ള മാർഗ്ഗം നിർദ്ദേശിച്ചു. പിന്നെ അതിന്‌ മഹത്തായ പ്രതിഫലവും നൽകി. രാത്രി എഴുന്നേറ്റു നമസ്കരിക്കാൻ നിങ്ങളോട്‌ കൽപിച്ചു. നിങ്ങൾ അപ്രകാരം ചെയ്തു. പകൽ നോമ്പനുഷ്ഠിച്ചു. നിങ്ങൾ നിങ്ങളുടെ നാഥന്റെ കൽപന അനുസരിച്ചു. അതിനാൽ നിങ്ങളുടെ ഉപഹാരം സ്വീകരിക്കുക'. പെരുന്നാൽ നമസ്കാരം കഴിഞ്ഞാൽ മലക്കുകൾ ഇങ്ങനെ വിളിച്ചു പറയും 'അറിയുക, നിങ്ങളുടെ നാഥൻ നിങ്ങൾക്ക്‌ മാപ്പ്‌ നൽകിയിരിക്കുന്നു. നിങ്ങൾ സന്മാർഗ്ഗം പ്രാപിച്ചവരായി വീടുകളിലേക്ക്‌ തിരിച്ചു പോവുക. ഇന്ന്‌ ഉപഹാര ദിനമാണ്‌ ഈ ദിനത്തിന്‌ ആകാശത്തും ഉപഹാര ദിനം എന്നാണ്‌ പറയുക" (ത്വബ്‌റാനി)

കഴിഞ്ഞ ദിന രാത്രങ്ങളിൽ നിർവ്വഹിച്ച ഓരോ അരാധന കർമ്മവും വൈയക്തികമായിരുന്നുവേങ്കിൽ ഈദ്‌ ഒരു സാ​‍ൂഹികാരാധനയാണ്‌. അതിനാൽ താൽക്കാലികമായി നമസ്കാരം പാടില്ലാത്ത സ്ത്രീകളോടു പോലും ഈദ്‌ മുസല്ലയിലേക്ക്‌ പുറപ്പെടാനും നമസ്കാരത്തിൽ നിന്നും വിട്ടുനിൽക്കുകയും മറ്റു പ്രാർത്ഥനാ പ്രകീർത്തനങ്ങളിൽ പങ്കു ചേരാനും അവർ നിർദ്ദേശിക്കപ്പെട്ടു. അവർക്ക്‌ പങ്കെടുക്കാൻ പറ്റുന്ന തുറസ്സായ സ്ഥലത്താണ്‌ ഈദ്‌ നമസ്കാരം നബി നിർവ്വ്വഹിച്ചതു. ഒരു ആദർശ സമൂഹത്തിന്റെ സംഗമ വേദിയാണ്‌ ഈദ്‌ ഗാഹ്‌. മതാപിതാക്കൾ ഭാര്യ കുട്ടികളുമായി ഈദ്‌ മുസല്ലയിൽ ഒരുമിച്ചു കൂടുന്നു. കുടുംബങ്ങൾ, അയൽവാസികൾ സുഹൃത്തുക്കൾ തുടങ്ങിയവരുമായി സൗഹൃദം പങ്കു വെക്കുന്നു. സ്നേഹബന്ധം പുതുക്കുന്നു. ഒരുമിച്ചിരുന്ന്‌ അല്ലാഹുവിനെ പ്രകീർത്തിക്കുന്നു. 

അല്ലാഹു അക്ബർ  ......................... അല്ലാഹു അക്ബർ .............................. വലില്ലാഹിൽ ഹംദ്‌.

പരസ്പര സ്നേഹത്തിന്റെയും സാഹോദര്യത്തിന്റെയും പ്രഖ്യാപനമാവണം ഈദ്‌ ആഘോഷം. ഇസ്ലാമിക സംസ്കാരവും തനിമയും ഉയർത്തിപ്പിടിക്കുന്നതാവണം ആഘോഷം. കുടുംബ ബന്ധങ്ങൾ പുതുക്കാനും സാഹോദര്യം പുതുക്കാനും ഈദ്‌ നിമിത്തമാകണം. അസുഖം മൂലവും മറ്റും ബുദ്ധിമുട്ടുന്നവരെ സന്ദർശിക്കാനും ആശ്വാസമേകാനും അവർക്കുവേണ്ടി പ്രാർത്ഥിക്കാനും ഈ ധന്യമായ ദിനം കാരണമാവണമാവട്ടെ. അഘോഷ വേളയിലും ഒരു നേരത്തെ ആഹാരത്തിനു പോലും വകയില്ലാതെ തലചായ്ക്കാൻ അൽപം സ്ഥലമില്ലാതെ പാലായനം ചെയ്യുന്ന ഒരു വലിയ ജനവിഭാഗത്തെയോർക്കാനും കഴിയുന്ന സഹായം അവർക്ക്‌ ചെയ്യാനും ഈ അഘോഷവേളയിൽ കഴിയണം. അത്തരത്തിലുള്ളവരെ ഓർത്തു കൊണ്ടാവട്ടെ നമ്മുടെ ആഘോഷം.

ആഘോഷങ്ങളുടെയും വിനോദങ്ങളുടെയും ഇസ്ലാമിക നിർദ്ദേശങ്ങൾ പാലിക്കാനും ആത്മ വിശുദ്ധി കാത്ത്‌ സൂക്ഷിച്ചുകൊണ്ട്‌ പരസ്പര ബഹുമാനവും സ്നേഹവും സാഹോദര്യവും പങ്ക്‌ വെക്കാനും സുഹൃദ്ബന്ധവും കുടുംബ ബന്ധവും ഊട്ടി ഉറപ്പിക്കാനും ആശംസകൾ കൈമാറി ഈ ആഘോഷ വേളയെ നമുക്ക്‌ ധന്യമാക്കാം . നാഥൻ അതിന്‌ അനുഗ്രഹിക്കുമാറാവട്ടെ.

എല്ലാ സഹോദരീ സഹോദരൻമാർക്കും അൽ അൻസാർ സെന്ററിന്റെ ഈദ്‌ ആശംശകൾ.